Aktiviteti: Pemëtari
Zona: Dvoran, Korçë

Në Dvoran të Korçës, një fshat me kulturë pemëtarie të hershme, mahnitemi nga pemëtoret e ngritura plot estetikë të familjes Baki. Pas kthimit nga emigracioni, familja Baki investoi seriozisht në ngritjen e pemëtoreve të qershisë, kumbullës dhe mollës.

Takohemi fillimisht me Mirën, gruan sipërmarrëse të familjes Baki. Mira së bashku me bashkëshortin, përveç tokave në pronësi, kanë marrë me qira edhe tokat bujqësore të zonës, për të ngritur një aktivitet të mirëfilltë pemëtarie prej 1.5 hektarësh.

Mira tregon se pas kthimit nga Greqia, ishte FED invest institucioni i cili i besoi vizionit të familjes Baki dhe i mbështeti financiarisht në ngritjen e pemëtores së tyre.

 “Qershitë e mia janë të shitura pa ardhur sezoni. Cilësia e mirë më ka mundësuar një treg të sigurtë. E njëjta vlen edhe për mollën dhe kumbullën”, tregon Mira. “Megjithatë tregu online në ABA Online është e ardhmja. Për mua kjo rubrikë është me interes të veçantë dhe kam mbështetjen e stafit të FED invest për të më ndihmuar fillimisht me publikimin e produkteve të mia bujqesore”.

Mira gjithashtu tregon se ishte shfletimi i ABA Online, që e informoi lidhur me aplikimin e Skemës së Mbështetjes me Inpute Bujqësore, kriteret për të përfituar dhe afatet kohore. “ABA Online është një aplikacion informativ, që vërtet më informon. Më informoi për skemën dhe përfitova. Mirënjohje të thellë për mbështetjen me inpute bujqësore. Kryesisht kam blerë pleh kimik për pemëtoret. Jemi shumë të kujdesshëm me spërkatjen, këshillohemi edhe me agronomët e zonës.” 

Vendndodhja e pemëtoreve ishte ne aksin kombëtar Korçë-Sarandë, çka e bënte lehtësisht të aksesueshëm transportin. Mira na tregon për frigoriferët e ngritur së fundmi në zonë, në të dy anët e rrugës kryesore. “Po punohet intensivisht, emigrantët po kthehen dhe po ndërtojnë shtëpitë. Disa po i kthehen bujqësisë, po punohet.”

Familja Baki gjithashtu fermenton mollën dhe prodhon uthull organike me cilësi të lartë. Ky aktivitet ende nuk është formalizuar, por Mira tregon se falë mbështetjes së FED invest ndër vite, aktiviteti i familjes Baki rritet bashkë me kërkesat për financim.

“FED invest mbetet partneri më i besueshëm për familjen Baki”.

“Mirënjohës FED invest për mbështetjen ndër vite!”  

Endrit Hatija, Gjedh, Serra, Suk 1, Fier

Vendosur në fshatin Suk 1, të rrethit të Fierit, familja Hatija është ndër familjet fermere më punëtore të zonës. Në këtë 30 vjetor të institucionit tonë, kemi kënaqësi të veçantë të takohemi me brezin e dytë brenda të njëjtës familje, si anetarë të FED invest. 

Pas një bashkëpunimi të suksesshëm 20-vjecar mes FED invest dhe z. Bashkim Hatija, djali i tij më i vogël, Endriti gjithashtu është anëtarësuar dhe mbështetur financiarisht nga FED invest.

Me profesion veteriner, Endriti ka ngritur një fermë blegtorale dhe ushtron aktivitetin e rritjes dhe mbarështimit të gjedhit. Endriti na tregon makineritë mjelëse për lopët e qumështit dhe për procesin e mjeljes e depozitimit të qumështit në dhomën frigoriferike. Ai tregton qumështin tek kompania e bulmetit "Erzeni", me të cilën ka lidhur marrëveshje. Endriti gjithashtu mbarështon viça të racës blu belge, të cilat i tregton tek një kasap i zonës për mish konsumi. 

Falë mbështejes së FED invest për blerje të mekanikës bujqësore, Endriti përdor traktorin për të prodhuar vetë bazën ushqimore për gjedhin. Për të optimizuar kostot e fermës Endriti gjithashtu realizon vetë korrjen, magazinimin e foragjereve, shërbimet veterinare e zooteknike. 

“Në trajnimet e zhvilluara në Qendren ABA, kam marë njohuri teknike për të rritur rendimentin e fermës, jam njohur me risitë për teknologjitë e prodhimit dhe kam marrë edhe keshillim financiar. Në platformën ABA Online, veçanërisht jam i interesuar për çmimet e tregut të shumicës në tregun e Lushnjës. Shpresojmë në të ardhmen, në ABA Online të kemi të dhëna edhe për tregun e shumicës së Beratit dhe Fierit’, - shprehet Endriti.

Ai gjithashtu zotëron 3 dynym serra, në të cilat kultivon lakër, speca, domate dhe kastravec. Të gjitha këto produkte bujqësore, Endriti i prodhon për eksport. 

“Lakra është me leverdi, edhe pse sjell më pak fitim se domatja, kërkon më pak punë, por ka rendiment të lartë dhe tregu për eksport është i sigurtë’’, - shprehet Endriti. 

Duke falenderuar familjen Hatija për bashkëpunimin e gjatë dhe korrektësinë, i urojmë Endritit shumë suksese në aktivitetin e tij. 

“Falë bashkëpunimit dhe financimit serioz të FED invest……”  

Vizitojmë zonën e Lunxhërisë, hambarin e Gjirokastrës, për t’u takuar me një nga fermerët më punëtorë të zonës, Z. Vaso Vasi. Vendosur në fshatin Karjan të rrethit të Gjirokastrës, Z. Vaso është një agronom autodidakt, i cili asnjëherë nuk u largua nga bujqësia.

Pemëtaria dhe vreshtaria janë  kulturat kryesore që mbjell Z. Vaso. “Zona e Lunxhërisë është e bekuar. Ka ujë të bollshëm dhe tokë pjellore. Kam rreth 2.2 ha vreshta, të varieteteve të ndryshme. Prodhoj raki, si dhe tregtoj edhe rrush për konsum. Rakia e zonës së Lunxhërisë ka qenë gjithmonë e famshme dhe unë ruaj të njëjtën traditë përpunimi”.

Z. Vaso është gjithashtu dhe një ndër promotorët më aktivë të shërbimeve të ABA Online në zonë.